तांदूळवाडी – उच्छावली ग्रामपंचायत, मुकाम तांदूळवाडी, पोस्ट सफाळे, तालुका पालघर हे गाव पालघर तालुक्याच्या ठिकाणापासून सुमारे १८–२० कि.मी. अंतरावर वसलेले आहे. ग्रामपंचायतीअंतर्गत तांदूळवाडी व उच्छावली ही गावे येतात.

गावाचे एकूण क्षेत्रफळ अंदाजे ८७० हेक्टर असून ते प्रामुख्याने डोंगराळ, ऐतिहासिक व नैसर्गिक स्वरूपाचे आहे.

गावात एकूण ४८९ कुटुंबे वास्तव्यास असून २०११ च्या जनगणनेनुसार एकूण लोकसंख्या २१२३ आहे. त्यामध्ये १०४९ पुरुष व १०७४ महिला यांचा समावेश होतो.

गावाचा भौगोलिक विस्तार प्रामुख्याने तांदूळवाडी किल्ल्याच्या पायथ्याशी, डोंगराळ व वनक्षेत्रीय प्रदेशात असून शेतीयोग्य जमीन मर्यादित प्रमाणात उपलब्ध आहे. शेती (भातशेती) व मजुरी हे येथील प्रमुख व्यवसाय आहेत. प्रामुख्याने आदिवासी व कुणबी समाजातील लोक येथे राहतात.

गावाला रस्ते वाहतुकीची सुविधा उपलब्ध असून सार्वजनिक (एस.टी.) व खाजगी बस सेवा उपलब्ध आहे. तसेच सफाळे रेल्वे स्टेशन सुमारे ८-९ कि.मी. अंतरावर आहे.

हवामानाच्या दृष्टीने, उन्हाळ्यात तापमान साधारणतः ३२–३५°से. पर्यंत जाते, तर हिवाळ्यात तापमान तुलनेने सौम्य व आल्हाददायक राहते. पावसाळ्यात या भागात भरपूर प्रमाणात पर्जन्यवृष्टी होते, ज्यावर येथील भातशेती आणि अळंबीसारख्या नैसर्गिक रानभाज्यांचे उत्पादन मोठ्या प्रमाणात अवलंबून आहे.